علاش الشركات مكيعطوش ليا

بزاف ديال الناس كتسائل "علاش الشركات مكيعطوش ليا وخا كل يوم كنسيفط CV"

احتمالات علاش مكيعطوش عليك :

1- مشافوش CV ديالك أصلا : حيث أغلب الشركات كيتوصلوا بالمئات من CVs في بوسط واحد، و أي واحد مغاديش يقرا كل CV بوحدو و يعطيه وقت

مثلا توصل ب 500 CVs و أحيانا أكثر .. باش يقراه مزيان على الأقل خصوا 1 دقيقة .. لا يعقل غادي يضيع 1 دقيقة على كل CV باش يقرا كولشي !

علاش كيتوصلوا بهاد الكم الهائل من CVs ؟ المشكل الكبير هو أنك مني كتحط شي annonce طالب فيه بروفيل Bac+2 كيصدق حتى صحاب Bac+2/3/4/5 مسيفطين CV ديالهم .. و كاين غي لكيسيفط مسوقوش آ شنو طالبين .. فهنا كن أكيد CV ديالك متشافش وسط هادشي

2- ممقادش CV مزيان : كاينين ناس عامرين و أكفاء و طريقة كتابـة CV كا تضرب ليهم كولشي ف زيرو و كا تعرقل ليهم الحصول على الوظيفـة.

 أغلب CVs لكنشوف "مفيهم ميتشاف" حيث مولاه مقادرش يضيع ساعة المكانة يقاد CV ديالو مزيان .. CV هو passeport ديالك عند recruteur .... ايلا كان مطبوع مزيان غادي يعيطوا، كنتي غي مخربقو و مسيفطو، تا هداك recruteur غادي يدير ليه supprimer بكل بساطة و CV تايبقى هو المفتاح اﻷول باش توصل عند المشغل و حيد منك ديك الهضرة البئيسة ديال المعارف و باك صاحبي و الرشاوي، ما نكروش أنه هادشي كاين لكن كيف كاين هادشي كاين للي خدم بنزاهة و استحقاق بلا تدخل ولا والو، فقط كان نزق و سول على راسو اش خاصو يدير 

 كاين لكيقلب مزيان في الأنترنت باش يلقى Template لتوالم profile ديالو

لهذا دير في بالك را recruteur كيشوف CV ديالك ماشي نتا !

و من الأخطاء لكيوقعوا فيها الأغلبية :

كاين ناس لحد الآن كيكتبو كلمة CV كبيرة لفوق..واخا..دابا أنا ك RH ماغانكونش عارف أنه cv حتى نقراها لفوق..ماتنساش أن RH كيدير تقييم لشخصيتك من خلال التفاصيل الصغيرة..

3- كثرة الألوان و شكل الخطوط و مرة gras و مرة italique و مرة 30 في taille و مرة 5 .. و مربعات لا علاقة و مرة minuscule و مرة majuscule .. هاد الروينة كاملة كتعطينا CV موسخ، و هادي هي النظرة لغادي ياخذ عليك recruteur هو أنك "مقاديتي تا CV ديالك عاد نجيو نعطيوك بوسط !"

4- كيكون CV ديالك صعيب باش تقراه .. كتلقى formations مخزونين فشي بلاصة و compétences خاشيهم في الجنب و مبين ليا "الصورة ديالك" أو سمية شي شركة معروفة ... را كل حاجة خصك تخصص ليها مساحتها .. لا يعقل بلاصة coordonnées ديالك شادة مساحة كبر من expériences professionnelles ! و لا يعقل كاتب ليا عنوان كبير باش تعمر بلاصة شايطة ليك ! و لا يعقل أنك داير السطاج هو الأول و خازن الماستر ديالك التحت !

لا بد CV يكون مقاد مزيان كل حاجة في بلاصتها و كل حاجة بالعبار .. تخيل راسك في بلاصة recruteur آ شنو خاص يلقى أول حاجة يقراها في CV ؟ آ شنو خصك تبين باش تخليه يقرا CV ديالك كامل ...

قدما كان CV ديالك بسيط و مقاد و ساهل في القراية و فوق هادشي داير ليه template زوين .. هادشي كيعطيك احتمالات أنهم يقراو CV ديالك

ميمكنش تكون كتعرف تلبس و تقاد هادي و هادي و تشوف راسك في المراية و تجي CV ديالك لي هو كولشي كتعطيه لمول Cyber و لا كوبي كولي من شي CV أو كتفتح Word و كتبدا تزروط !

حاجة أخرى تفاداو تحطو logo ديال كل شركة و لا les icones غي زيادة بلا فايدة .. و معمرك تسيفط CV ديالك Version Word حيت الWord و كيفما كتعرفو يقدر يبين مثلا les fautes d'orthographe اللي تقدرو تكونو دايرين. بل و حتى la forme ديال CV ديالكوم تقدر تخسر بما أنها تقدر تخضع ل modification.

الPDF كيسمح ن la forme أنها تكون مقادة، و بالتالي أنها تكون احترافية و مهنية كتر

5- ايلا كنتي مزال كتقرا بلاما تبرزط راسك يعيطوا ليك .. ويلا كنتي مزال خدام في شركة بلاما تحلم يعيطوا ليك .. لا يعقل recruteur غادي يعطي فرصة ليك و نتا مزال مبرزط مع قرايا و لا يعقل يعيط ليك و نتا مزال خدام حيث ماشي بعيد تا هو ديرلوا من بعد هكداك !

7- واحد القضية من الأحسن تركزوا عليها و هي أنك دير email بسميتك و كنيتك فقط، و تكتب العمر ديالك بلا تاريخ الازدياد و الصورة تكون professionnel ماشي مصور selfie و خلي CV ديالك خاوي من هاذ الكلمات 

 (téléphone..email..adresse)..يعني كتب نمرتك وإمايلك وعنوانك من غير ما تحط هاذ الكلمات..

و أهم حاجة لعندو شي سطاج كتب les tâches لكنتي كدير على الأقل 3 أو 4، را هاد les tâches مهمين بزاف باش كيعرف آشنو كتعرف تدير و مهمين أكثر ايلا ذكرتي فيهم mots clés لطالبين في داك البوسط لباغين

الأكثرية كيدير السطاج بلا missions .و بعض المرات تا الخدمة مكيديرش ليها détails .. و هادشي كيخلق مشكل recruteur مغاديش يتسنا حتى تجي عندو باش يسولك على شي حاجة لمفروض تكون في CV !

8- بالنسبة للناس لساكنين في مدن أخرى بعيدة على البلاصة في كاين بوسط .. دير في بالك recruteur مكرهش يلقى في CV شي واحد ساكن فوق الشركة !

لا يعقل نتا داير ساكن في الرباط و البوسط ف طنجة و كتقول علاش معيطوش ليا ؟ في نظرك نعيط واحد ساكن قريب و لا واحد في الرباط ؟؟

أي واحد باغي يدفع لشي مدينة يبدل adresse لديك البلاصة !

9- محدك débutant تواضع .. لا يعقل واحد كيقلب على خدمة و كيقوليك بغيت بوسط في الحي الفلاني و الزنقة الفلانية و لا الشركة الفلانية ... را هدا هو الطنز العكري !

و معمرك تقول را من départ خصني نخدم في الدومين ديالي أو أنا عندي Bac+5 خصني ندفع كبير !

10- معمرك تدفع لشي بوسط ماشي في الدومين ديالك أو كثر من المستوى ديالك أو قل من المستوى ديالك .. لأنك ماشي بوحدك لدافع و أكيد كاين داك البروفيل المناسب لداكشي لباغين و مغاديش يعيطوا ليك

دير في بالك أنك ماشي بوحدك لمسيفط CV .. كاينة تنافسية و خصك sélectiona من وسطهم

11- ديما بين داكشي لنتا مجهد فيه هو الأول في CV .. عندك formation مطلوبة و متكمن من داكشي ديرها هي اللولة .. ايلا عندك expérience مجهدة ديرها هي اللولة أو قاري فشي مدرسة معروفة ....

12- من أضعف الإيمان CV ديالك سميه .. لا يعقل مسميه ur'ftgr أو شي تخربيقة .. حيث منين كتيلشارجا غادي يتلف .. حاجة بسيطة تقدر تضيع عليك فرصة

13- معمرك تكتب شي حاجة في CV غي باش تسمى معمروا .. و معمرك دير شي photo كبيرة أو ناقصة في qualité 

14- التاريخ كنديروا الشهر و السنة فقط ماشي 7 أبريل 2025 و لا 27 يوليوز 2040 .. لا يعقل ديبلوم عندك فيه جوج كلمات و التاريخ شاد ليك سطر ! وماتحطش اختصار للكلمات مثلا bac بدل baccalauréat.

و تجنبوا ديك الخ (....) تا واحد ميكمل من راسو في بلاصتك .. يا كتب داكشي كامل يا دير نقطة و رجع للسطر

15- بعد المرات recruteur خاصو يقلب على بروفيل مزيان و في نفس الوقت بأقل ثمن لهذا دير في بالك باللي profil ديالك كيخلع داك recruteur بمعنى كعما يتسناك تتجي عندو باش تقولوا منخدمش بهاد الصالير !

16- دير في بالك email لكتسيفطو مصنف spam بمعنى را كيمشي boîte spam و كعما كيتشاف و السبب يا إما كتسيفط Candidature ديالك بزاف و شي نهار برزطي شي واحد و دار ليك signaler comme spam

يا نتا مدرتيش référence لطالبين ليك .. حيث الأغلب كيدير gestion emails عن طريق filtrage

الإميلات صحاب الدومين مثلا كيمشيو ديركت لشي dossier

و إميلات شركة معينة كيمشيو ل dossier بوحدو

إذن عوض يبقى يقلب و لا يتخلطوا ليه les emails في boîte كيديروا هاد الطريقة باش كل حاجة كتمشي بلاصتها

ويلا متا غلطتي في référence فكن أكيد مغاديش يقراه ليك !

17- كاين لكيدير titre في CV ديالو و يمكن داك titre هو سباب مكيعطوش ليك ايلا كنتي دافع لشي بوسط ماشي في الدومين ديالك أو ماشي نفس التخصص لداير نتا !

17- دير في بالك احتمال أنه داك البوسط كاين تنافس عليه و كيما سبق أشرت را بعض المرات بوسط واحد كتجي على قبلو 500 candidatures ! فكيفاش نتا غتبان وسطهم ؟

النصف قارين نفس تخصصك و النصف الآخر عنده expérience .. فهنا أكيد صحاب expérience عندهم avantage و وسطهم كاين avantage عند الناس لمقادين CV ديالهم و وسطهم كاين ناس قراب للشركة و وسطهم كاين ناس CV ديالو كيخليك تبغي تعيطلوا و دير معاه entretien

18- دائما دير في بالك كتعامل مع نفسية recruteur .. يعني يقدر يشوف CV ديالك و متعجبوش .. عادي ! يقدر يشوفك مدايراش foulard و متعجبيش .. عادي ! يقدر يشوفك دايراه و متعجبيش تا هي عادي .. توقع أي حاجة

توقع أيضا يقدر recruteur يعيط لواحد ساكن في تفس حومتو أو مدينتو الأصل .. توقع أيضا ميعيطش ليك حيث ننا niveau عليه .. توقع أيضا يقدر يكون كيميل للبنات و غادي يعيط ليهم أو العكس .. كاين لغايجي هادشي عجب .. و لكن راه كاين و كاين مكثر من هادشي !

الخلاصة هو أنك ضروري دير شي احتمال من هادوا و كل جوج سيمانات ايلا معيط ليك تا واحد حاول تبدل CV ديالك .. ماشي تبدل الزواق و لكن داكشي لكاتب و structure ديال كل حاجة فيه .. 

بس : شحال من واحد عندو مستوى دراسي مقبول و ديبلومات مزيانين و قادر يتأقلم فسوق الشغل، لكن تايعيا ما يدفع و والو ما كاينش للي معايط ليه ولا مسوق ليه و تطيح عليه الكآبة و يبدا يسب فالدولة و باك صاحبي و للمعارف و الرشوة و و ..هادشي كاين

لكن واش متأكد أنك مقاد راسك من كل الجوانب ؟ على كاع هذ الناس للي خدامين غا بالمعارف و الرشاوي الا انت ؟ ديك الهضرة دعندك بيسطون تخدم كاينة، .. ولكن واش چاع لي خدام بيسطوني؟ إلا بغيتي الحاجة خاصك تقاتل عليها، الساهلة راه عمرك تشمها فهاد البلاد، نهار تقتنع بلي ما غاديش تجيبها باردة، ديك الساعة غادي تقاتل المرة الأولى و الثانية و ال30 تاتجيبها.. تقبل بلي المصير ديالك هو تعصر مخك مزيان ولا ضرب تمارة وتعرق وتنشف وطيح و تنوض حتى توقف على رجليك، تجيب خدمة تجيبها كيما دارو خوتك.